डीप फ्रिज’ बोकेर पहाड उक्लिँदा गाउँमा हलचल, तिहारमा आउँदै डार्क कमेडी फिल्म ‘जिरो डिग्री

सुनसरी । विकट पहाडी गाउँ, विदेशिएका सन्तान, गाउँमै आमाबुवाको मृत्यु अनि शव सुरक्षित राख्न ‘डीप फ्रिज’ बोकेर उकालो लाग्नुपर्ने बाध्यता । यही असामान्य र रहस्यमय कथावस्तुमा आधारित डार्क कमेडी फिल्म ‘जिरो डिग्री’ आगामी तिहारमा प्रदर्शनमा आउने भएको छ ।

मेघौली फिल्म्सको ब्यानरमा निर्माण भएको फिल्मको ‘फर्स्ट लुक’ भिडियो सार्वजनिक गर्दै निर्माण टिमले प्रदर्शन मिति घोषणा गरेको हो । सार्वजनिक भिडियोले दर्शकमाझ फिल्मप्रति उत्सुकता थप बढाएको छ ।

फिल्ममा अभिनेता विजय बराल ‘पुन्य चौलागाईँ’ नामक चतुर वडा अध्यक्षको भूमिकामा देखिएका छन् । चस्मा, बाक्लो जुँगा, सुट र ढाका टोपीमा प्रस्तुत उनको लुक्सले विशेष चर्चा बटुलेको छ । भिडियोमा एकातर्फ ‘भ्रष्टाचारलाई रोकौँ !’ लेखिएको पोस्टर टाँसिएको देखिन्छ भने त्यही पोस्टरअगाडि वडा अध्यक्ष पुन्य चौलागाईँ पैसा बुझिरहेको दृश्यले नेपाली राजनीति र नेताहरूको दोहोरो चरित्रमाथि व्यङ्ग्य प्रहार गरेको संकेत गर्छ ।

“जहाँ समस्या त्यहाँ पुन्य चौलागाईँ” र “यो गाउँमा बाहेक अरु को नै छ र मेरो आफ्नो” जस्ता संवादले पात्रको अवसरवादी शैली झल्काउँछन् । त्यस्तै, सेतो घोडामा दुईवटा स्ट्यान्ड फ्यान बोकेर हिँडेको दृश्य र गाउँलेहरूले पहाडी बाटोमा ठूलो काठको बाकस बोकेको दृश्यले फिल्मलाई थप रहस्यमय बनाएको छ ।

हालैको सफल फिल्म ‘बेहुली फ्रम मेघौली’ का निर्देशकद्वय सजन काफ्ले र आकास बरालले यस फिल्मको संयुक्त निर्देशन तथा पटकथा लेखन गरेका हुन् । फिल्ममा विजय बरालसँगै प्रकाश घिमिरे, राजन भुसाल, सनिशा भट्टराई, वसुन्धरा भुसाल, रमेश बुढाथोकी, लोकेन्द्र लेखक र सन्जोग रसाइलीलगायत कलाकारको अभिनय रहेको छ ।

कास्कीका धिताल गाउँ, अर्मलाकोट, घार्मी र बगर क्षेत्रमा छायांकन गरिएको फिल्मका कार्यकारी निर्माता मोती कार्की हुन् । छायांकन निशाल पौडेल, सम्पादन चानस पुन मगर, रङ्ग संयोजन राजेन्द्र मोक्तान तथा सङ्गीत अङ्कित बाबु अधिकारीले गरेका छन् ।

तिहारको बिदालाई लक्षित गर्दै निर्माण गरिएको ‘जिरो डिग्री’ लाई काठमाडौं उपत्यकाभित्र डि सिएन र बाहिर कुबेर सिने डिस्ट्रिब्युसनले वितरण गर्ने भएका छन् । फरक कथावस्तु र व्यङ्ग्यात्मक प्रस्तुतिका कारण फिल्मले नेपाली बक्स अफिसमा राम्रो प्रभाव छाड्ने अपेक्षा गरिएको छ ।