आठ वर्षपछि निर्देशनमा रेखा थापा, तीजमा आउँदै ‘माया भनेकै यस्तो होला’

काठमाडौं । नेपाली फिल्म उद्योगकी चर्चित अभिनेत्री रेखा थापा आठ वर्षपछि पुनः निर्देशनमा फर्किएकी छन् । उनले निर्देशन गरेको नयाँ फिल्म ‘माया भनेकै यस्तो होला’ आगामी भदौ २६ गते हरितालिका तीजको अवसरमा देशभर प्रदर्शनमा आउने भएको छ ।

यो फिल्म रेखा थापाका लागि विशेष मानिएको छ, किनभने उनले पहिलोपटक आफ्नै ब्यानर ‘रेखा फिल्मस्’ बाहिर रहेर निर्देशनको जिम्मेवारी सम्हालेकी छन् । हाल पोस्ट–प्रोडक्सनको चरणमा रहेको फिल्मले प्रेमकथामार्फत सामाजिक सम्बन्ध, भावना र परिवेशलाई प्रस्तुत गर्ने निर्माण पक्षको दाबी छ ।

फिल्मको अर्को आकर्षण भनेको यसको बलियो कलाकार टोली हो । वरिष्ठ कलाकार मदनकृष्ण श्रेष्ठदेखि सृष्टि श्रेष्ठ, नीति शाह, नम्रता श्रेष्ठ, उषा खड्गी, लक्ष्मी गिरीलगायतका चर्चित कलाकारहरू एउटै पर्दामा देखिनेछन् । साथै विशाल पहाडी, संगम भण्डारी, रवि डंगोल, सुनिता श्रेष्ठ र विनोद पौडेलको पनि अभिनय रहेको छ ।

मुख्य भूमिकामा रहेका दिल श्रेष्ठ ६ वर्षपछि ठूलो पर्दामा पुनरागमन गर्दैछन् । ‘पर्खि राख है’बाट अभिनय यात्रा सुरु गरेका दिलले यसपटक अनुभवी कलाकारहरूसँगको सहकार्यलाई आफ्नो करिअरको महत्वपूर्ण अवसरका रूपमा लिएको बताएका छन् ।

‘दिया एण्ड अमु फिल्मस्’को ब्यानरमा निर्माण भएको फिल्मका पटकथा लेखक ध्रुव लम्साल हुन् । हरि नारायण श्रेष्ठ, माया देवी श्रेष्ठ, नवराज श्रेष्ठ, जस्मिन श्रेष्ठ र प्रकाश श्रेष्ठ निर्माताको रूपमा रहेका छन् । सुदीप बरालको छायांकन र प्रशान्त सिवाकोटीको संगीत रहेको फिल्मले तीजको माहोलमा दर्शकलाई मनोरञ्जनसँगै भावनात्मक कथा पनि दिने अपेक्षा गरिएको छ ।