कमेडी नाइट विथ च्याम्पियन्स’मा आइजीपी दानबहादुर कार्की, प्रहरीलाई समर्पित विशेष एपिसोड प्रसारण हुँदै

काठमाडौं । लोकप्रिय टेलिभिजन कार्यक्रम ‘कमेडी नाइट विथ च्याम्पियन्स’को आगामी एपिसोड नेपाल प्रहरीलाई समर्पित विशेष संस्करणका रूपमा प्रसारण हुने भएको छ। यस एपिसोडमा नेपाल प्रहरीका महानिरीक्षक (आइजीपी) दानबहादुर कार्की मुख्य अतिथिका रूपमा सहभागी भएका छन् भने देशभरका विभिन्न इकाइमा कार्यरत एक सय जना प्रहरी कर्मचारी विशेष अतिथिका रूपमा कार्यक्रममा उपस्थित रहेका छन्।

कार्यक्रम निर्माण टिमका अनुसार प्रहरी संगठनको योगदान, जिम्मेवारी र समाजप्रतिको सेवाभावलाई सम्मान गर्दै विशेष अवधारणामा यो एपिसोड तयार गरिएको हो। दर्शकले उक्त विशेष प्रस्तुति आगामी मंगलबार राति ९ बजे हिमालय टेलिभिजनमार्फत हेर्न सक्नेछन्।

कार्यक्रमका निर्देशक विशाल भण्डारीले यसपटकको एपिसोड मनोरञ्जनसँगै सम्मान र प्रेरणाको सन्देश बोकेको बताए। उनका अनुसार कार्यक्रममा प्रहरी संगठनका विभिन्न पाटालाई हास्यव्यंग्यात्मक शैलीमा प्रस्तुत गरिएको छ भने आइजीपी कार्कीसँग रोचक संवादसमेत समेटिएको छ।

“प्रहरी संगठनप्रति सम्मान व्यक्त गर्ने उद्देश्यले यो विशेष एपिसोड निर्माण गरिएको हो। मनोरञ्जनका लागि हल्का रोस्ट र रमाइला प्रस्तुति पनि समावेश गरेका छौं, जसले दर्शकलाई भरपुर मनोरञ्जन दिने विश्वास लिएका छौं,” निर्देशक भण्डारीले बताए।

हाल ‘कमेडी च्याम्पियन सिजन–४’ को अडिसनका लागि नेपालगञ्जमा रहेका भण्डारीले यस एपिसोडले प्रहरी र सर्वसाधारणबीचको सम्बन्धलाई अझ नजिकबाट बुझ्ने अवसर प्रदान गर्ने विश्वास व्यक्त गरे।

कार्यक्रमको प्रचारस्वरूप सार्वजनिक गरिएका तस्बिरहरूमा आइजीपी कार्की कलाकार र प्रस्तोतासँग रमाइलो संवादमा सहभागी भएको देख्न सकिन्छ। निर्माण टिमका अनुसार एपिसोडमा प्रहरी जीवनका अनुभव, चुनौती, सफलताका कथा र समाज सेवाका विविध पक्षलाई मनोरञ्जनात्मक ढंगले प्रस्तुत गरिएको छ।

कार्यक्रमकी अध्यक्ष तथा वरिष्ठ कलाकार दीपाश्री निरौलाले सुरक्षा र शान्ति कायम राख्न निरन्तर खटिने प्रहरी कर्मचारीप्रति सम्मान व्यक्त गर्दै यो एपिसोड विशेष रहेको बताइन्।

“देशको सुरक्षा, नागरिकको संरक्षण र शान्ति स्थापना जस्तो महत्वपूर्ण जिम्मेवारी वहन गर्ने प्रहरीहरू हाम्रो समाजका वास्तविक नायक हुन्। यस विशेष एपिसोडमा उनीहरूका अनुभव, प्रेरणादायी कथा र रोचक संवाद दर्शकमाझ ल्याउने प्रयास गरेका छौं,” उनले भनिन्।

‘कमेडी नाइट विथ च्याम्पियन्स’ले यसअघि पनि विभिन्न क्षेत्रका व्यक्तित्वहरूलाई अतिथिका रूपमा सहभागी गराउँदै मनोरञ्जनसँगै सामाजिक सन्देश दिने प्रयास गर्दै आएको छ। प्रहरी संगठनलाई केन्द्रमा राखेर तयार गरिएको यो विशेष एपिसोडले दर्शकलाई हाँसो, प्रेरणा र जानकारी एकैसाथ प्रदान गर्ने अपेक्षा गरिएको छ।

कार्यक्रमप्रेमीहरूका लागि यसपटकको प्रस्तुति अझ विशेष हुने निर्माण पक्षको दाबी छ। प्रहरी संगठनको सेवाभाव, अनुशासन र समर्पणलाई सम्मान गर्दै तयार गरिएको यो एपिसोडले मनोरञ्जनसँगै प्रहरीप्रतिको सकारात्मक दृष्टिकोण निर्माण गर्न पनि सहयोग पुग्ने विश्वास गरिएको छ।