‘होस्टेल ३’को ‘रक अन’ गीत सार्वजनिक, दोस्रो हप्तामा पनि दर्शकको उत्साह उस्तै

इटहरी/ नेपाली फिल्म ‘होस्टेल ३’ ले प्रदर्शनको दोस्रो हप्ता प्रवेश गर्दा पनि दर्शकको उत्तिकै साथ पाइरहेको छ । पहिलो हप्तामै उल्लेखनीय व्यापार गरेको यो फिल्मको गीत ‘रक अन’ दर्शकहरूको मागअनुसार युट्युबमा सार्वजनिक गरिएको छ । निर्देशक सशान कँडेलका अनुसार, फिल्मको अन्त्यमा समावेश गरिएको यो गीतलाई दर्शकहरूले मन पराएपछि डिजिटल प्लेटफर्ममा रिलिज गरिएको हो ।

गीतमा पारस बम ‘कुलब्वाय’ र रिहान गिरीको अभिनय छ भने स्वर समीर काजीले दिएका छन् । यसलाई महेश ज्ञवालीले लेखेका तथा संगीतबद्ध गरेका हुन् भने एरेन्जर योगेश काजी रहेका छन् । फिल्मको व्यापारको कुरा गर्दा, ‘होस्टेल ३’ ले पहिलो हप्तामा नेपालमा मात्र ४ करोड ३२ लाख ग्रस कलेक्सन गर्न सफल भएको छ ।

नेपालबाहेक यो फिल्म हाल मध्यपूर्व, अस्ट्रेलिया लगायतका देशहरूमा प्रदर्शन भइरहेको छ भने नेपाली समुदाय रहेका अन्य मुलुकहरूमा समेत रिलिज हुने तयारीमा रहेको निर्देशक कँडेलले बताए । इमिरेट्स, बहराइन, कतार र अस्ट्रेलियाबाट समेत राम्रो व्यापार भइरहेको चर्चा छ । दोस्रो हप्तामा पनि दर्शकको चाप घटेको छैन । निर्देशक कँडेलका अनुसार, शनिवार हलमा उल्लेखनीय दर्शक उपस्थित भए । हेर्नुस् भिडियो ।

कडेलका अनुसार ‘हामी निरन्तर हल भिजिट गरिरहेका छौँ, वितरकहरूबाट राम्रो रिपोर्ट पाइरहेका छौँ । दोस्रो हप्ताको शनिवार त झनै उत्साहजनक रह्यो,’ उनले भने । यो फिल्ममा पारस बम ‘कुलब्वाय’, सिम्रन पन्त, आशिष घिमिरे, पदम तामाङ, हेना नगरकोटी, रिहान गिरी, समा पराजुली लगायतका कलाकारको प्रमुख भूमिका छ । प्रवीण खतिवडाले वार्डेनको भूमिका निभाएका छन् ।

आशिष पुरुष, रोहन श्रेष्ठ, उमर खान र सन्तोष बानियाँ पनि फिल्ममा देखिएका छन् । ‘होस्टेल ३’ को पटकथा तथा संवाद माधव शर्माले लेखेका हुन् भने उनले नै एसोसियट निर्देशन पनि सम्हालेका छन् । फिल्मका निर्माता सुरेश कँडेल, कर्ण कार्की र गोविन्द अधिकारी हुन् । सह-निर्मातामा शिशिर ज्ञवाली, अनीश सिग्देल, कुन्दन गुप्ता र गणेश मगर रहेका छन्। कार्यकारी निर्माता शङ्कर कोइराला हुन् भने लाइन प्रोड्युसर कोसिस राज क्षेत्री रहेका छन् ।