विश्वव्यापी प्रदर्शन अभियानमा निस्कियो ‘मालती मंगले’, रामकृष्ण ढकाल अमेरिका प्रस्थान

काठमाडौं । नेपाली फिल्म ‘मालती मंगले’ को विश्वव्यापी प्रदर्शन अभियान सुरु भएको छ । फिल्मका निर्माता तथा लोकप्रिय गायक रामकृष्ण ढकाल फिल्मको अन्तर्राष्ट्रिय प्रदर्शन तथा साङ्गीतिक कार्यक्रमका लागि अमेरिका प्रस्थान गरेका छन् ।

विदेशमा रहेका नेपाली दर्शकमाझ फिल्म पुर्‍याउने उद्देश्यसहित सुरु गरिएको अभियानको पहिलो चरणमा अमेरिका, क्यानडा र अस्ट्रेलियामा विशेष प्रदर्शन गरिनेछ । प्रदर्शनसँगै ढकालले दर्शकहरूसँग साक्षात्कार गर्ने र आफ्ना चर्चित गीतहरू प्रस्तुत गर्ने कार्यक्रमसमेत रहेको जनाइएको छ ।

सार्वजनिक तालिकाअनुसार अमेरिकामा जुन ५ मा Boston र जुन ६ मा New Hampshire मा विशेष प्रदर्शन तथा साङ्गीतिक कार्यक्रम आयोजना गरिनेछ । त्यसपछि फिल्म North Carolina, Colorado र Texas मा पनि प्रदर्शन गरिनेछ । क्यानडामा जुनको तेस्रो साता Toronto मा फिल्म प्रदर्शन हुने तय भएको छ । यस्तै जुलाई ४ मा Sydney मा रेड कार्पेट प्रिमियर आयोजना गरिनेछ ।

निर्देशक प्रकु पाण्डेय को कथा तथा निर्देशन रहेको फिल्ममा विजय बराल, वर्षा राउत र मेक्सम गौडेल मुख्य भूमिकामा छन् । फिल्ममा प्रकाश घिमिरे, सरिता गिरी, नरिन थापा, मान्सु सापकोटा, सुस्मा निरौला र सुनिल तामाङलगायत कलाकारको पनि अभिनय रहेको छ ।

निर्माण पक्षका अनुसार अमेरिका र अस्ट्रेलियापछि युरोपका विभिन्न देशहरूमा पनि फिल्म प्रदर्शन गरिनेछ । युरोप भ्रमणमा कार्यकारी निर्माता सागर ज्ञवाली सहित अन्य कलाकारहरू पनि सहभागी हुनेछन् । निर्माण पक्षले ‘मालती मंगले’ को अन्तर्राष्ट्रिय अभियानले विदेशमा रहेका नेपाली दर्शकलाई फिल्म र संगीतमार्फत विशेष मनोरञ्जन प्रदान गर्ने विश्वास व्यक्त गरेको छ ।