पल–मलिकाको जोडीसहित ‘आ बाट आमा २’को छायांकन सुरु, दसैंमा प्रदर्शन गर्ने तयारी

काठमाडौं । बहुप्रतिक्षित नेपाली फिल्म ‘आ बाट आमा २’को औपचारिक छायांकन आजबाट सुरु भएको छ । अभिनेता पल शाह र अभिनेत्री मलिका महतको जोडीलाई मुख्य भूमिकामा प्रस्तुत गर्दै निर्माण टिम सोमबारदेखि फ्लोरमा उत्रिएको हो ।

आइतबार मात्रै मुख्य अभिनेत्रीका रूपमा मलिका महत अनुबन्धित भएको घोषणा गरेको निर्माण पक्षले कास्टिङ लाइनअप पूरा भएसँगै जेठ १८ गतेबाट फिल्मको सुटिङ सुरु गरेको जनाएको छ । फिल्मको छायांकन चित्लाङ, काठमाडौं र बेलायतको लन्डनमा गरिनेछ ।

दर्शकमाझ लोकप्रिय बनेको पल–मलिका जोडीलाई पुनः ठूलो पर्दामा प्रस्तुत गर्ने उद्देश्यसहित निर्माण पक्षले मलिकासँग अन्तिम सम्झौता गरेको हो । म्युजिक भिडियोमार्फत चर्चित बनेको यो जोडीको फिल्मी केमेस्ट्री कस्तो रहनेछ भन्ने विषयमा अहिले नै दर्शकमाझ उत्सुकता देखिएको छ ।

निर्देशक चन्द्र पन्तको निर्देशनमा निर्माण भइरहेको फिल्ममा मलिका महतसँगै रिश्ता गुरुङ र निकिता आचार्यको पनि मुख्य भूमिका रहनेछ । गत वर्ष सफल व्यापार गरेको ‘आ बाट आमा’को सिक्वेलका रूपमा निर्माण भइरहेको यो फिल्म आर्या इन्टरटेन्मेन्ट प्रालिको ब्यानरमा तयार हुँदैछ ।

फिल्मले छायांकनअघि नै अन्तर्राष्ट्रिय तथा स्वदेशी वितरणका महत्वपूर्ण सम्झौता गरिसकेको छ । अमेरिका र क्यानडाको प्रदर्शन अधिकार डोको फिल्म्सलाई तथा नेपाल वितरण अधिकार आरआर फिल्म्सलाई प्रदान गरिएको छ । यस्तै, डिजिटल अधिकार ओएसआर डिजिटलले खरिद गरिसकेको निर्माण पक्षले जनाएको छ । व्यापारिक रूपमा बलियो सुरुवात गरेको ‘आ बाट आमा २’लाई आगामी दसैंको अवसर पारेर असोज ३० गते देशव्यापी प्रदर्शन गर्ने तयारी गरिएको छ ।