चलचित्र कलाकार संघको अध्यक्षमा उत्तम केसी विजयी

नेपाल चलचित्र कलाकार संघको २१औँ साधारण सभा तथा नयाँ नेतृत्व चयनका लागि सम्पन्न अधिवेशनबाट कलाकार उत्तम केसी ‘चुईचुई पारेर’ अध्यक्षमा निर्वाचित भएका छन् । काठमाडौँमा आइतबार सम्पन्न निर्वाचनको अन्तिम मतपरिणाम सोमबार मध्यरात १२ः२७ बजे सार्वजनिक गरिएको हो ।

कुल ३५६ मत खसेको निर्वाचनमा अध्यक्षका प्रत्याशी अभिनेता सबिन श्रेष्ठलाई पछि पार्दै केसीले २१६ मतसहित स्पष्ट जित हासिल गरेका हुन् । श्रेष्ठले १३२ मत प्राप्त गरेका थिए । कलाकार संघको नेतृत्वका लागि भएको प्रतिस्पर्धालाई कलाकार वृत्तमा निकै चासोका साथ हेरिएको थियो ।

संघको दुई उपाध्यक्ष पदमा शिवहरि बैरागी र पूजना प्रधान विजयी भएका छन् । बैरागीले १४६ तथा प्रधानले १४४ मत प्राप्त गरे । उनीहरूका प्रतिस्पर्धी पनाह अधिकारीले १३५, उद्धव भट्टराईले १०७, डिबी तामाङले २७ र राजेन्द्र बस्नेतले १८ मत प्राप्त गरेका थिए ।

महासचिव पदमा सुनिल कटवाल विजयी बनेका छन् । उनले १९५ मत प्राप्त गर्दै प्रतिस्पर्धी रामेश्वर बुर्लाकोटीलाई पराजित गरे । बुर्लाकोटीले १२५ मत प्राप्त गरेका थिए । सचिव पदमा भने गोपाल ढकालले २१४ मतसहित प्रभावशाली जीत निकाले । उनकी प्रतिस्पर्धी पल्पसा डंगोलले ११० मत प्राप्त गरिन् ।

कोषाध्यक्ष पदमा तेजुला खतिवडा १४९ मतसहित निर्वाचित भइन् । उनका प्रतिस्पर्धी पवित्रा आचार्यले १०६ र खुश्वु खड्काले ५८ मत प्राप्त गरे । सहकोषाध्यक्षमा पवन केसी १६१ मतसहित विजयी भए । उनले गीता नेपाललाई झिनो अन्तरले पराजित गरेका हुन् । नेपालले १५३ मत प्राप्त गरेकी थिइन् ।

त्यसैगरी, खुला कार्यसमिति सदस्यतर्फ १० पदका लागि २८ जना कलाकार चुनावी मैदानमा उत्रिएका थिए । जसमा दमन रुपाखेती सर्वाधिक १४६ मतसहित विजयी भए । इन्द्रबहादुर लामा ‘खम्बे’ले १३०, चन्द्रकला राई ‘लब्ली संगम’ले ११६ तथा छुल्ठिम गुरुङले १११ मत प्राप्त गर्दै कार्यसमिति सदस्यमा निर्वाचित भएका छन् ।

नवनिर्वाचित नेतृत्वले कलाकारहरूको हकहित संरक्षण, चलचित्र क्षेत्रको व्यावसायिक विकास तथा संघलाई अझ सक्रिय र प्रभावकारी बनाउने प्रतिबद्धता जनाएको छ ।