कोशी प्रदेशका १ सय बढी चलचित्रकर्मीलाई परिचयपत्र वितरण

इटहरी/ फिल्मलाई केवल मनोरञ्जनको साधन मात्र नभई प्रदेशको पर्यटन प्रवर्द्धन र आर्थिक समृद्धिको मुख्य आधार बनाउने उद्देश्यसहित कोशी प्रदेशमा एक ऐतिहासिक कार्यक्रम सम्पन्न भएको छ । शनिबार मोरङको सुन्दरहरैंचा–२, मृगौलीयामा सम्पन्न वृहत् फिल्मकर्मी भेलामा प्रदेश सरकार र निजी क्षेत्रको सहकार्यमा फिल्मकर्मीका लागि विशेष सहुलियत र पूर्वाधार विकासको योजना सार्वजनिक गरिएको हो ।

नेपाल चलचित्रकर्मी महासंघ कोशी प्रदेशद्वारा आयोजित ‘कोशी पर्यटन प्रवर्द्धनमा सिनेमा र कलाकार’ विषयक अन्तरक्रिया तथा सम्मान कार्यक्रममा बोल्दै प्रमुख अतिथि एवं कोशी प्रदेशका पर्यटन, वन तथा वातावरण मन्त्री भिम पराजुलीले प्रदेशभित्र फिल्म छायांकनलाई सहजीकरण गर्न सरकार तयार रहेको प्रतिबद्धता व्यक्त गरे ।

कार्यक्रमलाई सम्बोधन गर्दै मन्त्री पराजुलीले भने, “कलाकार र सिनेमाले बोक्ने सन्देश कुनै पनि विज्ञापनभन्दा शक्तिशाली हुन्छ। कोशी प्रदेशका पर्यटकीय गन्तव्यलाई पर्दामा उतारेर विश्वसामु चिनाउन म चलचित्रकर्मीलाई आग्रह गर्दछु। यसका लागि प्रदेश सरकारले आवश्यक नीतिगत सहयोग र सहजीकरण गर्नेछ ।” मन्त्री पराजुलीले मृगौलीयामा महासंघको पहलमा निर्माण हुन लागेको ‘फिल्म सुटिङ भवन’ ले कोशी प्रदेशको कला क्षेत्रमा नयाँ आयाम थप्ने विश्वास व्यक्त गर्दै यस कार्यले आफूलाई उत्साहित बनाएको बताए।