डेमी मूरको टिप्पणीपछि हलचल, कान्समा कृत्रिम बुद्धिमत्ता अब चलचित्र उद्योगको नयाँ यथार्थ

कान्स  । अभिनेत्री डेमी मूरले कृत्रिम बुद्धिमत्ता (AI) अब रोक्न नसकिने वास्तविकता भइसकेको बताउँदै यससँग संघर्ष गर्नुको सट्टा सहकार्यको बाटो खोज्नुपर्ने धारणा राखेपछि विश्व चलचित्र उद्योगमा नयाँ बहस सुरु भएको छ ।

कान्स चलचित्र महोत्सवको निर्णायक सदस्यका रूपमा सहभागी मूरले पत्रकार सम्मेलनमा भनिन्, “कृत्रिम बुद्धिमत्ताको विरोध गर्नु भनेको अन्ततः हारिने लडाइँ लड्नुजस्तै हो । त्यसैले यससँग कसरी सहकार्य गर्न सकिन्छ भन्ने उपाय खोज्नु नै उपयुक्त हुन्छ ।” उनको भनाइ सार्वजनिक भएसँगै सामाजिक सञ्जालमा मिश्रित प्रतिक्रिया देखिएको छ ।

कतिपयले उनको भनाइलाई सिर्जनात्मक क्षेत्रका श्रमिकको हितविपरीत भएको भन्दै आलोचना गरेका छन् भने केहीले भने AI ले फिल्म उद्योगमा ल्याउन सक्ने जोखिमलाई उनले सामान्य रूपमा लिएको टिप्पणी गरेका छन् ।

यस वर्षको कान्स चलचित्र महोत्सव र फिल्म बजारमा भने एउटा कुरा स्पष्ट देखिएको छ—कृत्रिम बुद्धिमत्ता अब चलचित्र निर्माणको शैली परिवर्तन गर्ने निर्णायक चरणमा प्रवेश गरिसकेको छ । विभिन्न परियोजनाहरूमा AI प्रयोग खुला रूपमा स्वीकार गर्न थालिएको छ । क्रिटरज’ नामक पारिवारिक एनिमेटेड फिल्मले आफूलाई “मानव नेतृत्वमा बनेको तर AI सहयोग प्राप्त” परियोजनाका रूपमा प्रस्तुत गरेको छ । त्यस्तै ‘प्याराडाइज लस्ट’ र ‘बिटक्वाइन’ जस्ता फिल्महरूले पनि कृत्रिम बुद्धिमत्तालाई आफ्नो प्रमुख प्रविधिक आकर्षण बनाएका छन् ।

‘पल्प फिक्सन’का सह–लेखक रोजर एभरीले ‘प्याराडाइज लस्ट’ निर्माण गरिरहेका छन् भने ‘द बोर्न आइडेन्टिटी’का निर्देशक डग लाइमनले ‘बिटक्वाइन’ निर्देशन गरिरहेका छन् । फिल्ममा गाल गाडोट, केसी एफ्लेक र पिट डेभिडसनजस्ता कलाकारको अभिनय रहने बताइएको छ । बिटक्वाइन’का निर्माता रायन काभानाफले ‘एक्मी कृत्रिम बुद्धिमत्ता तथा विशेष प्रभाव’ नामक नयाँ कम्पनीमार्फत AI–सहयोगी फिल्म निर्माण प्रणालीको प्रवर्द्धन गरिरहेका छन् । कम्पनीले छिटो दृश्य विकास र सहज कार्यप्रवाहलाई मुख्य लक्ष्य बनाएको छ ।

एक अनुभवी फिल्म बिक्री प्रतिनिधिका अनुसार, पहिले AI प्रयोगबारे खुलेर कुरा गर्न हिच्किचाउने निर्माताहरू अहिले भने यसलाई लुकाउन छोडिसकेका छन् । यसअघि कान्स, सनडान्स लगायत महोत्सवमा AI लाई कलाकारको रोजगारीमाथि खतरा मानिन्थ्यो । अहिले पनि एनिमेसन, भिजुअल इफेक्ट र स्क्रिप्ट विश्लेषणजस्ता क्षेत्रमा रोजगारी कटौतीको चिन्ता कायमै छ ।

तर, उद्योगभित्र अहिले AI लाई पूर्ण रूपमा अस्वीकार गर्नुभन्दा कलाकारको स्वर, अनुहार र सिर्जनात्मक अधिकार सुरक्षित गर्ने बहस बलियो बन्दै गएको छ ।अभिनेता म्याथ्यु म्याककोनाघेले आफ्नो आवाज र अनुहार अनुमति बिना प्रयोग हुन नदिन कानुनी प्रक्रिया अघि बढाएका छन् । उनले सहमति र स्वामित्व सुनिश्चित गर्नुपर्नेमा जोड दिएका छन् ।

यसैबीच रेबेल मिडियाकी प्रमुख लउरा लुइसले AI लाई अन्य उत्पादन उपकरणजस्तै उपयोगी साधनका रूपमा व्याख्या गर्दै यसले निर्माण लागत घटाउन सक्ने बताएकी छन् । ब्लीकर स्ट्रिटका प्रमुख केन्ट स्यान्डर्सनले भने AI ले सामान्य प्रयोगकर्तालाई पनि ठूलो स्टुडियोस्तरका फिल्म बनाउन सक्षम बनाउने भविष्य देखिने धारणा राखेका छन् ।

तर कान्स महोत्सव निर्देशक थिएरी फ्रेमोले भने कलाकार, लेखक र प्राविधिकहरूको रोजगारी जोगाउन कडा कानुनी नियमन आवश्यक रहेको चेतावनी दिएका छन् ।